Login

Lost password?

New to site ? Create an Account

Register by invitations only

Ask for invitation


Already have an account? Login

Forgot Password


Back toLogin

انسف تلفازك القديم

انسف تلفازك القديم

بغض النظـر عن كميـة الاستفزاز اللي موجودة في الإعلانات اليومين دول وبغض النظر عن كرهـي العميق للإعلانــات في مبدئهـا ومضمونـها وإعتبـاري ليها إنهـا غسيل دمـاغ، قررت على غير العـادة إنـي مسيبش الـتليفزيون في الفواصل الإعلانيـة، عشان أكتب حاجة يمكن تساعد الـناس اللي مش شغـالة في الـ Marketing إنهم يحافظوا على سلامـة دمـاغهم من محـاولات الـ Advertisers المستميتة لغسيل الدمـاغ. ويمكن تساعد النـاس اللي شغالة في الـ Marketing إنهم يقدمـوا Value أحسن من كدة للنـاس وللـ Brands اللي شغالين عليهـا.

المُــزة / Change of Perception

001-hardees-katherine

Hardee’s اتعــاقد مع “كاثرين ويب” على بتـاع خمسميت صورة وإعلان ليهـا وهي بتاكل الـ buffalo blue cheeseburger بتـاعها وبتستمتـع أوي بأكله بطريقة خلت الإعلان أقرب لفيلــم Porn. واللي ميعرفش كاثرين ويب – ويا رب متدورش عشان ماخدش ذنبك – فهي بتشتغل موديل، وملكة جمـال Alabama 2012، و رقم 6 على مستوى أمريكـا لعام 2012.. بس كدة..

المطلــوب منك كـ “زبـون” تصدق إن واحدة زي دي، حياتهـا وأكل عيشهـا معتمدين بشكل أساسي على الـ Diet بتاكل زيـك Buffalo Blue Cheeseburger، يحتوى على ما لا يقل عن 1100 سُعـر حراري، ده من غير الـكولا والـبطاطس لسة !

بغض النظر إن الإعلان رخيص، جو مُزز وبـتــاع، إنمـا الفكرة عمـوماً موجودة، يعني هو كريستيانو رونالدو وميسي بياكلو من KFC فعلاً؟! مش هقولك من منطلق الدايت يا سيدي،،، من باب الاستنضاف حتـى.

الحبكــة بقى ببساطة إنك عارف إن الـ Fast Food اللي هو الـ Junk Food أكتر حاجة بتسبب سِمنـة وأمراض.. هارديــز وغيره عارفين إنك عارف.. بس إنت من كتر حُبك في الرمرمـة بتحاول تنسى… وهما بيساعدوك، كاثرين نفسهـا بتســاعدك.

الاستهبــال / Repositioning

أخاف أجيب أمثلة فـأحصر الغبـاء،، لأنه لا حصر له الصراحة. يعني هنتكلم على إعلانات مسحوق الغسيل والاختبـارات الخزعبلية بتاعت عبلة كامل، ولا هنتكلم على المظاهرة بتاعت Harpic ولا نفتـح ونخش فى طارق نور واللي عمله في البنك الأهلى في رمضان ولا إيه ولا إيه؟!

هو يبدو إن الغبــاء مستمـر فـ يا نتعـود عليه، يا نحوّل القنــاة، يا نعمل ثورة ونرفـع عليهم قضية “بره مصر طبعـاً” بحجة الغبـاء التجــاري.. عادي Redbull هتدفع 13 مليون غرامة في القضيـة اللي اترفعت عليهم عشان مفيش جنــاحـات بتطلع لما بتشربهـا.. هيعملــوا ايه مع مليون شــاب مصري استخدم Gillette Vector الجديدة ومعاها AxeChocolate ومعرفش يُظبط معزة حتى؟

للعلم بس: قضية ريدبول كانت بسبب إن كان الـ Redbull في تأثيرهـا الفعلـي عليك – من غير إعلانات يعني- ماتفرقش خالص عن أي Power Drink تاني أو كوباية القهـوة العادية. حتى محـامي الدعوى كان بيتريق وبيقول “كوباية قهوة غالية جداً.”

النصب / Deceptive Slogans

خلينــا نتفـق على تلات حقايق مهمـة، أولاً: مفيش فاكهـة بتقعد شهر من غيــر ما تحمض ولو حتى في التلاجة… ثانياً: كيلـو البرتقال البلدي بـ 3 جنيـه، وبيعمل نص لتر… ثالثاً: البرتقال أصلاً مش بنفس سعر المانجة ولا الجوافة وأكيد مش بنفس سعر الأناناس.

فاللي عايز أوصلهـولك إن لمــا بيور أو لمـار أو غيرهـم يقولولك الصلاحية ست شهــور وفي نفس الوقت العصير طبيعــي 100% والسعر من 9 لـ 10.50.. لأ وكمـان كنوع من الإعجــاز العلمي .. إن كل الفواكه بنفس السعر.. أبوس إيدك متصدقـهومش.

وبرضــه على سبيل المثال Pepsi دفعت دفت بتـاع 9 مليون دولار تعويض بسبب القضيـة اللي اترفعت عليهم عشان قالو إن Naked Juice اللي الشركة بتعملـه “طبيعي 100%”

الحبكـة في الموضوع واللي خفض الفرامـة على Pepsi واللي أنا عايزك تاخد بالك منه بقى إن إن منظمة الغذاء والأدوية العالمية نفسهـا معندهـاش مشكلة إن أي Brand يكتب كلمـة طبيعي 100% على المنتج بتـاعة طالمـا لا يحتوى على ألوان صنـاعية، نكهـات صنـاعية، مواد كيماوية غير مصرح بهـا.. الـ FDA نفسهـا قالت إنهـا صعب تحدد ايه طبيعي وايه مش طبيعي طالما دخل مرحلة التصنيـع.

الفكـرة ببساطة إن في تقريباً على حد علمـي تلات طرق عشان العصير يقعد فترة طويلة في السوق: همـا البسترة، والضغط HPP، والأشعـة فوق البنفسجية.. ومش هعرف أتكلم عن مدى صحتهم أو ضررهم.. أنا بس حابب أتكلم عن مـدى صحة العبارة بتاعت طبيعي 100% .. هل بعد الـ Processing اللي فوق ده ينفـع نقول عالعصير طبيعـي؟ هل بعد الـ Processing ده، العصير بيفضل محتفظ بقيمته الغذائية؟ … شوف هي الـ FDA مبتلزمـش المُصنعين إنهم يقولوا الطريقة اللي قدروا يحافظوا بيهـا عالعصير طالما الطريقـة Approved فـ حسب قوانين الـ FDA ينفع يقولو طبيعي.. إنمـا حسب العصير اللي بنعصره في البيت؟؟؟ 🙂

الاستنصــاح / Legal Disclaimers

وإنت بتتفرج على إعلانات التلفزيون هتلاقي شريط أبيض كدة بيقولوا عليه disclaimer بيتكتب بفونت حجمـه 1Px ولـونه أبيض وغالباً بيبقـى على خلفية بيضــة وبيستمر لمدة ثانيتين بالظبط، شوية أمثلة عالماشـي،، شــوف يا سيدي:

01 dettol

ديتــول في الإعلان بيقولك يساعد في تخفيض الأمراض بنسبـة 75%

الـdisclaimer بقى بيقولك: التهابات الجهاز الهضمي والتنفسي لدي الأطفال تحت خمس سنوات، يعني همـا مش مسئولين عن مدى صحـة الحـملة في حالة إن إبنـك مش في الـ75% دول، ولو اللي عنده أكتر من مجرد إلتهــاب، ولو سنـه أقل من خمس سنين، ولو اللي عنده حاجة غير الجهاز الهضمـي والتنفسي مثلاً.

02 activia

أكتيفيا بتقولك ايه بقـى إن الزبـادي بينشط ويسـاعد عملية الهضم وجايبينلك مرة دُرة وهيا معندهـاش كرش خالص ومستمتعه بمعلقـة الزبادي جنب الشُبـاك، أو علا وهيا برضـه مستمتعـه جداً بنفس المعلقة..

بغض النظر إني مش شايف إيه وجـه الاستمتاع في الزبـادي، الـdisclaimer بقى بيقولك: ضمن نظام غذائي وأسلوب حياة صحيين، يعنـي ماهو أي حد بيعمـل الاتنين هيطلعلوا كرش ليه أساساً؟

للعلـم بس: Activia زيـه زي أي زبـادي عادي جداً، واترفع عليهـم قضية زي بتاعت Redbull كدة برضـه ودافعين بتـاع 45 مليون دولار تعويض.

H&S

هيد أند شولدرز، اللي هو رقــم واحد فعلاً، إنمـا بنــاءاً على احصائيات المبيعـات سنـة 2010، يعنـي من أربــع سنين.. يعنــي بيقولك إن آخر نجـاح حققتـه الشركة في السـوق كان من أربع سنين؟

الـسكيزوفرينيا / Inconsistency

MBC عملت حملتين أه مش في نفس الوقت إنمـا لو فكرت فيهـم دمـاغك بجد هتصدّع.. ركّـز معايا.. 🙂

الحملـة الأولـى: أربع شباب راكبين عربيـة لونهـا فضـي سايقين بسرعـة وبيسمعـو مزيكـا ومولعينــها والدنيـا حلاوة

mbc-aqim-anghamy

الحملة التانية: تلات شبــاب برضـه راكبين عربيـة لونهـا نبيتي سايقين بسرعـة وبيسمعـو مزيكـا بصـوت عالي ومولعينهــا وبرضه الدنيا حــلاوة

mbc-aqim-salatak

أيوا المشكلـة فين؟؟؟ أقولك أنا المشكلــة فين..

الأربع شباب الأولانيين عملوا download للـ Anghami Appغني بأعلى صوتك لا توقف! والدنيـا حلـوة،

التلات شباب التانيين عملوا حادثة وماتوا فجأة ودي كانت حملة أقم صلاتك قبل ممـاتك.

زي بالظبـط إحساس مايجيبلك الأذان وسط So You Think You can Dance؟ عشان تتعدى مرحلة غسيل الدمـاغ لمرحلـة البسترة.

دي نبذة مختصـرة عن ازاي الأكل بيتصور في الإعلانـات

https://www.youtube.com/watch?v=zGj2eVgWI6Q

ودي شوية خـدع كدة عالمـاشي عشان لزوم التصوير وكدة

Commercials tricks we keda

ملحوظـة بس: أنا بشتري ديتـول وبأكل كنتاكي أحيـاناً وبحب لمـار الرمـان ً وبكـره الزبادي الصراحة وبحب الرمرمة عادي جداً .. أنا بس بحاول على قد مأقدر مسلمش دمـاغي لحد كـ Consumer ومغسلش دمـاغ حد لو كـ Marketer. و علي فكره اللي اعلاناته وحشه و بيقدم حاجه محترمه كمنتج بفضل طول عمري اشتري منه و اللي اعلاناته حلوه و هو بيقدم اي كلام , بيتعمل عليه x من اول تعامل و ده معناه ان كل الشقلبه دي ملهاش لزمه

Ahmed AL Faramawi

Reviews

  1. Nour Fateh

    awesome bgd w l-27sn tri2tk f 3rd l kalam
    isa masr htb’a a7d l-dwal ‘lli mmkn nrf3 2dia 3l e3lanat fiha someday 🙂

    Replay
    • Faramawi

      Teslami ya Nour ya Rab
      We belnesba lmawdou3 masr ma3takedsh el sara7a 🙂

      Replay
  2. Lamiaa Amer

    اللللللله ينور عليك يا فرماوي لا فوض فوك يا راجل شفيت غليلي و قولت اللي بقوله للي حواليا ليا سنين
    حط علي كلامك بقي تقل دم الإعلان و سخافة السيناريو بتاعه و سطحية الفكرة اللي وراه في الغالب الأغلب
    حالياً بالنسبالي أول ما الإعلانات بتيجي بكتم الصوت و بقوم اعمل أي حاجة أو بقلب علي أي قناة تاني لدرجة إني بنسي اللي كنت متابعاه و بكمل مع حاجة تاني
    عمري ما اشتريت حاجة بسبب إعلانها و اعتقد ناس كتير كده… غباء بلا حدود و بردو المعلنين مكملين
    يبعزقو فلوسهم علي الإعلان و يدونا منتج أو خدمة بزراميط و إحنا نكع تمن اللي ضيعوه
    معلش بس أصلي مغلولة اوي منهم و إنته جبت جون بالمقال ده.. ياريتهم يشوفوه بقي

    Replay
    • Faramawi

      لميـا !! أنا عايزك تفشــي غلك وتنطلقي براحتك خالص 🙂 🙂

      Replay
      • Lamiaa Amer

        ربنا يقدرنا علي فعل الخير بقي 😉

        Replay
  3. Eslam

    مقالة رائعة جداً كلام دقيق وموزون وواقعى جداً , شكراً أحمد الفرماوى على المقالة

    Replay
    • Faramawi

      تسلـم يا إسلام 🙂 كل واحد لازم يخلي بالو من جمجتـه احنا ما حليتناش غيرهـا

      Replay
  4. mahmoud

    thank you to respect me and to respect my mind .

    Replay
    • Faramawi

      And You are most welcomed Mahmoud 😉

      Replay
  5. Ahmed Adel

    بغض النظر عن أخر سطرين دول 😀 بس بجد مقالة رائعة جداً

    Replay
  6. Ibrahim

    طب على كدة الإعلانات دي محترمة … أمال لو شفت أعلانات سينا كولا ولا زانوسي ولا الشخص اللي خرب الدنيا وكل روشنة الدنيا فيه عشان كيس عطر مضروب بنص جنية وكيس جل بربع جنية ! ويقولك اصل للشياكة عنواني!
    انا على فكرة ما بتفرجش على تلفزيون نهائيا إلا في حالات نادرة وللأسف بتعرض للهجوم البشع ده من الإعلانات !

    Replay
    • Faramawi

      ماهو أنا بس كنت بدي مثل على الـ Brands اللي المفروض إنهـا محترمـة، مفتحتش لسـه بقى توتوك سينما وشنبو أفلام وجلاوة روح والكلام ده 😀

      Replay
  7. Eslam Refaat

    المقال ده جامد بجد

    Replay
    • Faramawi

      إنت أجمد 😀

      Replay
  8. هاوي

    طيب ايه المثال الجيد للإعلانات علي التلفزيون ؟
    يعني الإعلان مفروض يكون عامل ازاي ؟

    Replay
    • Faramawi

      من وجهـة نظري كـ Customer اللي مبيحاولش يضحك عليا أو يستقل بدمـاغي
      ومن وجهة نظري كـ Marketer الإعلان اللي بيعمـل Higher Trust في الـ Brand بتاعتي و Higher Conversion للـ Product بتـاعي

      Replay
  9. Mohamed Hossam

    باختصار كدة..علي وضعك 😀

    Replay
  10. Nesma

    I loved the article, Ramadan is the best month to witness all that nonsense nonstop 😀

    Replay
    • Faramawi

      الاعلانات بتفطــر أكتر من المسلسلات اساساً 😀

      Replay
  11. norah.jamal

    و معظم الاكل في الاعلانات بيكون ني بالذات الرز و المكرونات و الاسماك في اعلانات الطبيخ و الزيوت عشان يطلع ليلمع . و معظم ان مكانش مل الموظيلز بيحجوا المعلقة فاضية في بقهم عشان تفضل بتلمع لما يطلعوها قال يعني بعد ما استمتعوا بالقطمة الرائعة من المنتج .
    حملة مظارة خاربك المتخلفة منعتني اشتريه سنييييين من كار الاستخفاف اللي فيها . و لما امي جابته مرة بالغلط بدل حاجة تانية عجبني جدا و قلت قد ايه هما اغبية و بيخلوا الناس تبعد عن منتجهم بغباء اعلاناتهم .

    Replay
    • Faramawi

      إيه ده هاربيك طلع كويس بعد الإعلان ده؟! 😀 أنا نويت أجربــه عشان الـ Word of Mouth الجميل ده بغض النظر عن الإعلان.
      أهـم حاجة التجربة فعلاً عشان نطلع بره دايرة التأثير النفسـي دي!!

      Replay
  12. mahmoud mohey

    انا مبسوط جدا من مقال حضرتك لانى استفدت منة كتير اوى و لانى ناوى اشتغل ف التسويق و عشان كدة انا معجب بمقالك لان ف عمق

    Replay
    • Faramawi

      وأنا مبسوط أكتر منـك 🙂 لأنـي أنا قدرت أفيدك بأي حاجة حتى لو بسيطة ,في نفس الوقت أستفيد من تشجيعـك!

      Replay
  13. hashad

    مقال رائع وفتحت دماغي علي حجات كتير مكنش واخد بالي منها
    صراحه انتوا ناس محترفه وربنا يكرمكم
    شكرا ليكم

    Replay

Write your review