اسلوب حياة Marketing الـ

الزمان : كنت لسة عيل أوزعة في تالتة ابتدائي.

المكان : كنت قاعد في أوضتي قال يعني بذاكر.

الحدث: المفروض يعني ان فاضل اسبوع على امتحانات اخر السنة و على كلامهم وقتها انها شهادة يعني و كلام من ده.

الصراع : بفكر ازاي اقنع ابويا يجبلي العجلة ام جرس زي بتاعة صاحبي

الشخصيات : ابويا، أمي، الواد حسام الدحيح (ابن الجيران)، ميس سلوى بتاعة الرياضة، جمعة حارس العمارة، وانا طبعا ( اللي هنّم على كل دول دلوقتي)

الحكاية:

في يوم من الايام، كنت قاعد في اوضتي بحل مسائل الحساب بتوع الواجب اللي كنت بعمله لـ ميس سلوى (اللي ماكنتش بفهم منها حاجة وكان ليها الفضل الاكبر اني اكره الرياضة )، وساعتها فكرت: هو انا ليه مايبقاش عندي العجلة ام جرس زي بتاعة جمعة ؟!!، بدل منا كل شوية قارفه و اخد منه لفة من ورا ابويا، طيب ما يبقى عندي واحدة انا كمان، حتى نخش سبق مع بعض و هو رايح يجيب الطلبات بتاعة العمارة.

و طبعا لو قولت لأبويا انا عاوز اجيب عجلة، هاخد سيل من اللوم، بداية من:  يابني انا خايف عليك تتعور، لحد وانت في ايه ولا في ايه، ما تركز في مذاكرتك يابني انت في شهادة دلوقتي، نهاية بقى بمعايرتي بمجموع تانية ابتدائي الي هو كان 90%.

ساعتها افتكرت ان ابويا بيحب الفك و التركيب زي عنيه و مفيش لمبة او جهاز بايظ في البيت الا و كان بيفضل وراه لحد ما يصلحه او يبوظ منه فـ يطلع اللي جواه و يجبله قطع غيار و كان بيبقى مصيرها بتاع الروبابيكيا، و بناء على كده روحت طلبت منه يجبلي لعبة الميكانوا، ساعتها فرح بيا اوي و جابلي اكبر ميكانوا وقتها.

ازاي الـ Marketing اسلوب حياة

قولت هعمله شكل عجلة بالميكانوا ده، و طبعا لاني لا افقه شئ عن هذا الاختراع، روحت للواد حسام ابن الجيران وهو مايتوصاش في الحاجات الملعبكة ديه وعمل ليا عجلة جامدة جدا.

وروحت لأبويا وريته العجلة وقالي انت اللي عامل ديه؟ قولتله طبعا و من غير ما حد يساعدني، فرح بيا اوي و قعد يقول لأمي شفتي الواد طالعلي اهو ازاي . فقولت بس هي ديه اللحظة المناسبة، فطلبت منه على بلاطة كده .. بابا انا عاوز اجيب عجلة زي اللي عملتها بالميكانو ديه، و ساعتها من غير تردد وافق على طلبي و جابهالي اول ما خلصت امتحاناتي، و كنت ساعتها فرحان و حاسس بانتصار غير طبيعي، زي كده فرحة حزلئوم و هو مسافر اليونان.

ازاي اقنع ابويا اني ادرس Marketing

و بعدين عدت الايام والسنين و دخلت الكلية اللي بحبها -الحمد لله- و عدت أول سنتين و في سنة تالتة كل واحد بيختار التخصص المفصل بالنسبة له. أنا كنت مقرر اني هدخل Marketing major من أول يوم في الكلية لأني مختار الكلية ديه علشان فيها الـ Major اللي بحبه، و بكل سعادة روحت البيت و قولت لأبويا انا اخترت قسم تسويق في ورقة الرغبات، و إذ بالمفاجأة الاقي ابويا بيقولي تسويق ايه و كلام فاضي ايه، ادخل محاسبة وانا اشغلك تاني يوم من تخرجك، و تبقى قاعد على مكتب و ليك قيمتك، مش تسويق بقى و تبقى مندوب مبيعات و بعدين التسويق ده حبة ناس نصابين.

فبدأت اقنعه بالتخصص بتاعي، وان اد ايه انا بحب المجال ده، و اني طموحاتي فيه كذا و كذا، و اني مش بحب المحاسبة، و من زمان و انا نفسي ادخل القسم ده، و في النهاية رفض و مقتنعش بردوا بكلامي، و بغض النظر اني دخلتMarketing في الاخر و فضل ابويا متجاهلني تماما لفترة ما، لكن سألت نفسي بعدها بفترة هو انا ازاي مقدرتش اقنع ابويا بأكتر حاجة بحبها في الدنيا، بالرغم ان تخصصي Marketing، و ابويا يعتبر أول Customer اتعامل معاه و للأسف فشلت اني أقنعه، و الموضوع ده حسسني بفشل و احباط كبير.

تطبيق علم الـ Marketing في الحياة الطبيعية

طيب تفتكروا ابويا وافق ليه يجبلي العجلة بالسهولة ديه ورفض اني ادخل التخصص اللي بحبه؟!!

علشان لما حبيت اقنعه بموضوع العجلة فكرت من ناحية اهتماماته هو، اكيد طبعا مكنتش مخطط لكده بشكل ناضج و ان ده تم بكل تلقائية لكن ده يعتبر اهم حاجة في الـ Marketing، و هو انك تفكر من الـ customer Perspective مش من اهتماماتك انت. و بالمناسبة اقوى Marketers هما الاطفال لأنهم بيركزوا معانا في كل تفصيلة و نتيجة ده عارفين الناس اللي حوليهم بشكل دقيق جدا، و ديه وظيفة الـ Marketers وهو انهم يركزوا مع الـcustomer بتوعهم و يعرفوا الـ needs و الـ wants بتاعتهم بدقة.

انما لما حاولت اقنعه بموضوع التخصص بتاعي، كنت بكلمه من ناحيتي انا، و ايه هي اهتماماتي و أحلامي واني هبقى جامد جدا في المجال ده، و مركزتش تماما في اللي هو بيحبه، و مربطش بين اهتماماتي و اهتماماته في نقطة واحدة تخليه يقتنع بفكرتي. و ده للاسف اللي بتعمله شركات كتير في مصر و هو انها بتتكلم عن نفسها كتير و ان منتجها ده احسن منتج و نسيوا خالص انهم يركزوا في كلامهم على احتياجات العميل و اهتماماته.

و في النهاية اكتشفت ان و انا صغير كنت Marketer اشطر بكتير من و انا كبير.

قولولنا انتوا كنتوا ازاي بتسخدموا الـ Marketing وانتوا صغيرين

لو عايز تقرأ اكتر عن الـ Marketing دوس هنا Click Here

محمد عاطف

ديسمبر 9, 2015

9 responses on "اسلوب حياة Marketing الـ"

  1. ألفكرة فى الماركتينج انه فعلا اسلوب حياة , مش مجرد حاجة بتدرسها , او بتشتغل بيها , بمجرد ما دخلت المجال , فا انت حياتك كلها بتبقى عبارة عن الاسلوب ده , والناس اللى بره , اللى مش فى المجال اقصد , ما يعرفوش اد ايه جمال الموضوع , خصوصا , لما تعمل اللى قلت عليه فى القصة دى , تطبق اللى تعرفه فى كل حاجة , الحياة بتبقى اسهل واريح بكتير اوى 😀
    انا مبسوط اوى انى لقيت حد غيرى بيعمل ده 😀

  2. اولا : مقال راااااااااااااااااااااائع جدا

    ثانيا : انا بعتقد ان كتير من الشركات بتعمل علي استغلال العميل في حين انك لو قدمت له خدمة لمجرد افادته فده سبيل ادعي انه يفكر فيك لو حب يشتري الخدمه دي

    ثالثا : مقالك ده من وجهة نظري افضل طريقة لتعليم التسويق

    شكرا لك

  3. من و انا صغير كنت فاكر كلمة made in japan او صنع فى اليابان معناها ان الحاجة دى بتعيش كتير و مش بتبوظ ابداً تخيل لما دولة توصل لطفل صغير ان اسمها لما يكون مكتوب على الحاجة دا دليل على الجودة و دا كان ناتج من ان كل حاجة كانت فى البيت بتبوظ و نرميها الا الحاجات اللى كان بيكون مكتوب عليها صنع فى اليابان … اليابان اول دولة استخدمت الماركتنج صح و خلت الناس تثق فى اسمها قبل اى حاجة تانية و بكدا النهاردة الواحد لو اتعرض عليه يكون يابانى احسن من لو اتعرض عليه يكون مليونير …. مقال رائع جدا جدا بالتوفيق يا اتش

  4. عجبتني جدا القصة..فعلا التسويق اسلوب حياه
    بس عندي تعليق بقى 😀
    اللي خلى باباك يجيبلك العجلة و انت صغير انك كدبت و فهمته ان عندك قدرات غير قدراتك -اللي هيا عملت العجلة بالميكانو-
    يعني سلكت طريق غير مشروع عشان توصل لهدفك
    اذا كانت حكاية العجلة دي حقيقية او لأ بس الفكرة ان مبدأ الكذب موجود
    حابة توضيح للنقطة دي 🙂

  5. فيد الناس …. الجملة دي سمعتها كتير و تقريبا وصلت بنسبة 90% من انا حعمل اية

    شكرا لكاتب المقال إلي انا معرفتش اسمة

    عمرو

  6. مبسوطه جدا اني وصلت للمقالات دي لانلاها فعلا رائعه ول
    marketing
    اكتر حاجه بحبها فعلا 🙂 الفكره ان الماركتر لازم يشغل دماغو 24 ساعه ازاي يوصل للادامو بطريقه يحبها ويقنعه.. الجديد التعلمتوا في المقال دا ان اهم حاجه يكون هدفك هو انك تفيد العميل علشان يرتبط بيك اكتر ويحس انك عايز مصلحته 🙂 ه

    • صح كده يا داليا أهم حاجة ان الـ customers بتوعك يحسوا ان قلبك عليهم مش كل همك تاخدى اللى فى جيبه وخلاص :/
      و باالتالى مش هتبيعى الا للى هيستفيد بالـ Product أو الـ Service بتاعتك .

      School of Marketing Team

Leave a Message