Student activity ـ7ـ مطبات اوعى تلبس فيهم لو شغال فى

مطبات الـ Student activities

تحذير مبدئى: الـ list  ديه معمولة مخصوص للناس اللى شغالة فى الـ NGOs أو ال student activities بشكل خاص فلو أنت من الناس الجامدة اوى فى الـ industry  بتاعتنا  من فضلك وفر وقتك واقفل ال article  وافتح أى حاجة تانية على نفس الـBlog بتاعنا ممكن تفيدك أكتر 😀

 

ندخل بقى فى موضوعنا …

بناءً على ما يطلبه المستمعون 😀  ولأن فى ناس كتير طلبت ان احنا نتكلم فى  ازاى تقدر تـ manage  أى page  لـ Non Governmental organisations  فقررنا أن هيكون فى جزء كامل هينزل على هيئة كذا article خاص بالموضوع مش بس بال Social media  بتاعته لكن  عموما هيبقى عن ال Inbound Marketing for NGOs  وهنبدأ بـ List  خفيفة كده موجهة بشكل خاص للـ Student activities بما أنهم أكتر ناس عندهم تغيير كل سنة فبيبقى عندهم مشكلة أنهم يعملوا Definite Structure يمشوا عليه.
الخلاصة أن الـ list ديه معمولة عشان لو أنت فى Student activity وعندك أى حاجة من الحاجات الـ 7 اللى هيتقالوا تحاول تعدلها قبل ما ندخل على التقيل..

 

1-الـ  Vision & Mission دول تعملهم فى ال Free time  بتاعك

 

أنا مش عارف أصلا مين الشخص الفاضى والمستفز فى نفس ذات الوقت اللى بيضيع وقت من عمره وقال ايه يعمل Brainstorming  مخصوص عشانهم هو أصلا ايه لازمتهم ! ولا حاجة أنت بس “بتبستفهم” فى الورق بتاعك عشان لما تقدمهم فى الكلية أو الجامعة يتقال عليك “مخلص ورقك” , أجبلك من الأخر ؟ اوعى تكتب حاجة فى أول شغلك كده وتتفق مع الفريق بتاعك عليها بحيث توصللها فى الأخر سبها تمشى بالبركة!

 

2- العدد عزوة!

 

لم ناس كتير ودخل عندك ناس كتير مش مهم  شخصيتهم ايه ولا الـ Qualifications  بتاعتهم ايه ولا متفقين معاك فى الـ goals  بتاعة فريقك ولا لأ .. المهم أنك تمشى و أنت رافع كتافك و بتهز فيها بأنك أكبر فريق فى الكلية أو فى الجماعة .

 

3- صاحبى وحبيبى وكفاءة:

لا يمكن طبعا تأّمن لحد غريب و تسيب صاحبك و حبيبك بره الفريق مهو مش معقولة يعنى هتدخل حد غريب ما بينكم , الشلة اللى قاعدة معاك على القهوة – أو فى الكافيه لو انتى بنت – هما أضمن ناس يشتغلوا معاك واقفلها عليهم لأن أى حد من بره أكيد هيبقى فكره غريب عن فكركم و ممكن-لقدر الله- يطلع أفكار جديدة تنجح فيسيطر هو أو يكسر “طابع الصحوبية اللذيذ” اللى موجود فى الشغل وممكن الشغل يقلب Formal و يبقى فى قوانين وبتاع ووجع دماغ .. ع ايه !

 

4- التقليد طريقك للنجاح !

 

بيدوا كورسات .. ادى كورسات , بيعملوا ندوات .. اعمل ندوات , بيعملوا شنط رمضان .. فأنت لازم لازم تعمل شنط رمضان ولبس العيد كمان يعنى هتعدى الموضوع كده مثلا! 😀

اوعى تبدع  كده وتخترعلك طريق جديد محدش عمله قبلك تمشى فيه و تفكر فى حاجة مختلفة تعملها للناس ( Purple Cow 😉  ).. الإختلاف أصلا وحش !

 

5- اعمل meeting عشان تتفق على meeting  😀 :

اه وهو الـ meeting  أصلا فايدته ايه غير أن احنا نشوف بعض و نتعازم على حساب المشاريب  ونشوف هنتقابل امتى وفين تانى “ثقافة الـ Meetings “

 

6- اطلب فلوس .. فلوس كتييير !

 

متتهورش فى يوم مثلاً وتعمل Fundraising session  لفريقك تعلمهم ازاى تجيبوا فلوس لل activities  , اشحت .. – لأ أسف سميها “اجمع تبرعات”- شكلها اشيك برضه – بس المهم فى الأخر يعنى لم فلوس سواء من الأعضاء أو من بره لأنك كل ما هتلم فلوس و اشتراكات أكتر كل ما هتبقى ناجح أكتر 😉

 

7- أخر حاجة.. هد المعبد و ابنيه تاني

 

اه خصوصا لو أنت اللى ماسك student activity  اوعى تستفاد من خبرات اللى قبلك -لقدرالله- أو تطلب مساعدتهم .. هما أصلا كانوا مبوظين الدنيا وأكيد أكيد معملوش أى حاجة صح فى الفترة اللى مسكوا فيها و بعدين يقولوا عليك ايه مش عارف تُسوق :O . فـهد بقى كل حاجة وابنى على نضيف وضيع الفترة اللى أنت ماسك فيها فى أنك توصل لنفس النقطة اللى وقفوا عندها!

 

واضح جداً أكيد بعد ما خلصت أن كل ما هتبقى بعيد عن الـ 7 حاجات دول اعرف أنك ناجح , الـ 7 دول كتبتهم من حكم تجربة شخصية أفتخر بفشلها – لأنى لو مكنتش فشلت مكنتش هحاول انهارده أكتب فى حاجة تخص الموضوع ده عشان غيرى يستفيد – !

 

مطلوب منكم 2 assignments  بساط جداً :

 

*أول حاجة تقولولنا ايه رأيكم فى ال article لأن بناءً على أرائكم هنقرر نكمل فى الموضوع ده ولا لأ وهنكمل ازاى !

 

*تانى حاجة هى أنه بما أن الموضوع ده اتكتب بناءً على طلبكم انتو و بالتالى أكيد معظمكم شغال فى NGOs  أو Student activities  فانتو كمان أكيد عندكم تجارب شخصية ممكن تشاركونا بيها عشان غيركم يستفيد 😉

Shehab Gomma

81 responses on "Student activity ـ7ـ مطبات اوعى تلبس فيهم لو شغال فى "

  1. طريقه كتابة المقال مش عجباني , استخدام اسلوب لو بتعمل الحاجات دي تبقى غلط مش لطيف , لكن استخدام اسلوب متعملش كذا ومتعملش كذا افضل
    #مجرد_رأي

    • ! أسلوبه معجبش يا إسلام article أولا أنا فعلاً بعتذر جداً لو الـ

      مش عارف حاسس أن الطريقتين متشابهتين لدرجة كبيرة , بس هو يمكن اللى خلانى أكتب بالأسلوب ده إنك لو بصيت حواليك هتلاقى للأسف الـ 7 حاجات دول موجودين فى أماكن كتير جدا , وفى :)الأخر أنا محترم وجهة نظرك جداً طبعا

    • إزيك يا شهاب 🙂
      أنا مبسوط إنك بقيت فى SOM
      لإنى بتابعها على طول وباستمرار، بوست بوست وبلوجاية بلوجاية 😀
      يبدو إنك هتكون إضافة قوية للسكول إن شاء الله

      بخصوص الـ 2 assignments بقى
      الطريقة استفذتنى جدا فى الأول، ويمكن ده إللى خلانى أكمل، بس أتمنى متعملش كده تانى :v

      يا ريت تنزل بسرعة بالـ
      inbound marketing for NGOs
      لإن أنا بعمل دلوقتى خطة السوشيال ميديا للنشاط بتاعنا إللى هو
      IEEE Zewail City
      وبدأت أحدد التراكات إللى هخلى الـ
      content creators
      يشتغلوا عليها، وخليت الديزاينرز يعملوا الديزاين الخاص بكل تراك ليهم وكده
      هو بصراحة أنا متوقع إن مش هيكون فى فرق أوى عن المقالات إللى فاتت الخاصة بالـ
      inbound marketing
      إللى حفظتها من كتر ما ذاكرتها عندكم من قبل ما أمسك السوشيال ميديا للتيم 😀
      بس حابب أشوف إيه إللى هتزوده وإللى هتأكد عليه بقى عشان يناسب الـ
      NGOs

      أتمنى تظبطوا الكود بتاع الموقع عشان لما بتكتب عربى وإنجليزى فى نفس السطر بيبوظ ترتبيب الكلام وبيقلبه زى الفيس زمان

      بكرر شكرى على المقال الجميل ده لإنه فعلا مفيد أوى، صحيح أغلبه موجه لـ الليدر أو إللى لسه بيأسس، بس بردو فيه حاجات تروح للـ ميمبرز عموما

      جزاك الله خيرا 🙂

      • أشكرك يا محمد جدااااا 🙂

        أولاً بكرر اعتذارى على تأخيرى فى الرد وأن المقال التناى اتأخر س ده لظروف خارجة عن إرادتنا

        باقى النصايح أوعدك إن احنا نحاول ناخد بيهافى خلال الفترة الجاية 🙂

        أخيراً حابب أشكرك بشكل شخصى على رأيك وكمان على مجهودك فى جامعة زويل 🙂

  2. الـ article تحفه بجد
    هااااااايل (Y)

  3. بجد ربنا يحميك نصايحك فادتني كتير ويا ريت تكمل في الموضوع ده

  4. الموضوع جامد و كل كلمه فيه واقعيه جدااا

  5. كمل ف الكلام عن الفشل والله فكرة جميلة جداااااااااا

  6. 7lw elklam gdn bs i think en thaqafet elstudent activities et3’yrt w 3dt elmra7el de 😀 so let’s move on to the next level 😀

  7. عمود اسبوعى لو سمحتم 🙂

  8. بص يا سيدى رقم 7 دى انا متفق معاك فيها تمام وازود عليها كمان انك لازم تحط التتش بتاعك وتدير المكان بشخصيتك انت ..
    رقم 4 بتاعت التقليد دى غلط خااااااااااااااالص .. بالعكس انا شايف انك تكون مختلف وتقدم حاجه جديده
    رقم 3 بقا لازم يكون اصحابك والناس اللى انت مشابهه ليهم ف الفكر حواليك … بس برضو لازم تجيب الاتجاه الاخر عشان هو دا الوحيد اللى هيقولك على سلبياتك وكمان هيكون بيفكر ف اتجاه مخالف ليك وبدل الفكره ما تتنفذ ب طريقه واحده او بمنظور واحد هتلاقى هو كمان عنده منظور محتلف
    ودمتم 😀

    • ! مقدرتش أوصل فكرته صح ليك article محمود أنا بعتذر جداً بس واضح أن الـ

      الحقيقة أن الـ7 حاجات اللى اتكلمت عنهم هما حاجات سلبية تماما والمفروض أنك تقيس نجاحك على مقدار بعدك عن النقط ديه , بما فيهم رقم 7 لأنك مش المفروض تهد خالص , اه يبقى شخصيتك باينة فى شغلك بس لازم تستفيد من كل حد جه قبلك حتى لو شغله كله غلط لأن لا يمكن لا يمكن مش هتلاقى فيه حاجة ولو بسيطة صح تفيدك .. كمان أنت لو حاولت تبنى من الأول خالص أنت فعلا هتقف عند نفس المستوى اللى هما وقفوا عنده لأن فرصتك أنك تمسك فترة طويلة اوى تثبت فيها شغك شبه مستحيلة !

  9. طيب ثوانى انا اتخلبط المفروض يعنى معملش meetings
    وﻻ ايه انا دلوقتى اعمل ال 7 دول وﻻ ﻻ 😀

    • 🙂 ازيك يا عبد الهادى

      اللى قصدته أنك قبل ما تعمله وتحدد معاده meetings لأ طبعا الـ 7 كلهم غلط .. اللى قصدته مش إنك متعملش
      لازم تكون محدد الاول أنت أصلا هتناقش فيه ايه فى نقط محددة للغاية ويكون كل اللى هيحضروا متبلغين بالشييت ده قبلها عشان تقدر تنجز حاجة لكن لو سبته كده عمرك ما هتنجز أى تانى وانت جوا عشان تكمل فيه meeting حاجة وفعلا هتلاقى نفسك بتحدد

  10. keep going i am a member in some NGO and i found your info. very important & useful to me .. thank you .. and waiting for the upcoming articles.

  11. المقال مفيد و طريقته جذابة عشان بتخللى الناس تفكر و تستنج الصح بنفسها استمروا من فضلكم و ياريت يبقي مرة الطريقة دى و فى الموضوعات الصعبة بقي النصيحة تبقى مصحوبة بمثال اومقال او نصيحة مباشرة و شكرا

  12. المقال جامد اخر حاجه 😀
    اكتر مشكله بتواجهنى ف Student activity هى تحكمات اللى ماسك النشاط 🙁 وتقييد الإبداع عند الباقى والزامهم بخطه واحده ولو وصلت انه يضيع الكوادر اللى عندها اكسبيرينس عنده ويبنى تيم جديد معندوش اى خبره علشان يشكله ع مزاجه 🙁

  13. المقال جميل جداً وبجد الانشطة الطلابية بتحتاج دايماً حد يفيدهم ويدهم خلاصة التجارب بتاعته
    ياريت تكمو اكتر فى الموضوع دة وكمان ممكن تكلموا الناس عن ازاى يعملوا
    Vision & Mission
    ويكونوا منظيمن فى شغلهم مش ماشين عشوائى وبالبركة والتقليد

  14. i like it too much …. u r inspiring me dude 😉

  15. بقولك ايه والله انت برنس وكلامك دا جميل جدا وانت راجل زي العسل وكمل ف الموضوع فكرته عجبتني

  16. بجد تسلم ايدك .. أسلوب رائع ^_^ ..

    في انتظار المزيييد المقالات اللي جاية (y)

  17. #شير_حته_من_التجربه
    في الغالب هتعدي بالكام مرحله دول لو انت في نشاط طلابي و كده >>

    -المرحله الاولي :
    هتحس ان شاء بنجاح و انك ماشي في الطريق و عندك شغف و الكل بيصقفلك ولا كأنك في الجيم و عاش يا وحش ، و حركات ^^
    بس هيصاحبها *ايه ده ؟ هو مش الشعراوي قال اذا لم يكن لك حاسد ولا حاقد فتأكد انك فاشل* هما فين ؟ ولا انا فاشل ؟ ؟
    و بأذن الله هتلاقي واحد يقولك لأ > انت ناجح و معندكش و انت فوقت النجاح في المرحله دي !! (Y) و في الغالب هتبقا كده فعلاً !

    -المرحله التانيه :
    بدأ يظهر عقبات و اعداء النجاح ^^
    نفس الشخص هتلاقي بيقولك > اهو اديم في الطريق > ادي #الحاسد و ادي #الحاقد >> انت في الطريق كمل ^^

    -المرحله التالته :
    صاحبك ده اصلاً هيزهق منك و هيسبك ، و انت هتفصل من الحاسد و الحاقد و هتأوتهم او هما هيسبوك ^^
    و برده لسه في عقبات !!

    -المرحله الرابعه :
    لسه في عقبـــــــات و الحاسد و الحاقد مش موجودين > فهتبدأ تسأل نفسك :
    #فاكر لما لاقيت بوست ع فيسبوك “مش شرط كتر اللي بيكرهوك دليل ع نجاحك ما يمكن انت فعلاً حيوان”
    احيـــه هو انا فعلاً حيوان !!!! ^^ :S

    و من هنا هيبقا قدامك حلين اصعب من بعض :

    الحل الاول : تعرف و تتأكد ان زي ما كل واحد قالك انت بتضيع وقت > ف انت فعلاً كده و زي ما اهلك قالولك انت مش فالح و ايه الهري ده ، و الكليه كان عندها حق لما ما وفقتش ع الايفنتس و كده ^^ و تروح تدور ع مجال تاني تنجح فيه و كفايه عليك نجاح كده !!

    الحل التاني :
    انك تجرب تعافر للأخر و تستعيذ من ان تكون مع الذين ضل سعيهم في الحياة الدنيا و هم يحسبون انهم يحسنون صنعا و تفتكر ان الله لا يضيع اجر من احسن عمله و ان الجزاء من جنس العمل ^^ و تكمل و انت و نصيبك !! ^^

    #كلام_كتير_كأنه_اتقال
    #تجربه_جديره_بالتجريب

    الحمد لله

    • مش عارف أرد ازاى والله يا إيمان 🙂

      ولما قررنا نبدأ عموما نتكلم عنarticle بس هو فعلاً الموضوع مش سهل , لما كتبت الـ
      كان عشان عارفين اد ايه هو مهم – رغم كل العيوب اللى فيه دلوقتى – فى أنه يبنى Inbound Marketing for non profits الـ
      شخصيات ويورث خبرات مختلفة تماما مش هناخدها من اى حتة تانية

      (Y) أحييك

  18. الاسلوب عجبنى و شدنى انى اكمل للاخر و ياريت تكمل عشان نستفيد اكتر

  19. ال7 نقط موجودين فعلا … كويس اننا نكشف المشاكل كلها قدامنا قبل ما نتكلم .. بداية كويسه يا شهاب ..
    بس اعتقد اللى هيفيد الناس اكتر انك تديهم حلول .. معظم الناس بيعملوا الغلطات دى وهما مش قصدهم ..
    بيختار اصحابه معاه علشان يحس بالامان و انه هيعرف يخليهم يشتغلوا .. و بيقلد الافكار اللى نجحت لانه متخيل ان دى اسرع طريقة للنجاح
    و بالنسبة للفلوس .. فهو بيبقى مش شايف فعلا اى طريق غير لم التبرعات ..

    ادينا و اديهم بدائل و حلول 🙂

    – انا حسام فهمى رئيس اتحاد جامعة طنطا و احد مؤسسى اسرة الميدان بالمناسبة و اتهرينا اجتماعات علشان نختار ميعاد لاجتماعات :-

    • ازيك يا د.حسام 🙂

      عشان كده أوعدك أن خلال أسبوع كحد أقصى هينزل ,:D Student activities أولا أنا سعيد جدا برأيك وواضح جداً من كلامك ونقدك أنك فعلاً مفحوت فى

      المكمل لده عشان يبقى قدرنا نساعد بحلول إيجابية مش بس عرضنا المشاكل article الـ
      أخر أتمنى لو ليك أى اقتراحات تانية تساعدنا بيها عشان نقدر نقدم فعلاً أكبر قدر من الإفادة 🙂

  20. مقال لا يقال عنه إلا أكثر من رائغ وملم جدآ :)))

  21. Hi shehab
    2walan 2o7yek 3ala el Article (Y) , Sanayan Ana ba3tarf 2ni 2tsadmt fi el 2awil 2n el Kalam da tal3 mank ba3dain fahmt fi el 2a5er fa 3agbtni el fakra keep going (Y)

    2nd assignment ba2a : momkan how to target your audience “fans” ma3 2a5tlaf sha5syathom , w 2zai ta2di 3ala sakaft el fake going 3ala el events la2n 2li bya7dar byab2a 1/10 el nas 2li 3amla going

    One of my experiences : 2ni ghayart el language bata3t el posts fa el engagement rate sad bashakl kbeer and it was the most shocking bansbali 😀

  22. الحقيقة إن قبل آخر كام سطر كنت مجهز كام شتيمة أكتبهم 😀
    بس عاش!

  23. هو بالظبط ال7 حاجات دول هما مشكلة اى نشاط طلابى
    و اهم جروب تتتعمل الجروب المهتم بزيادة الماديات
    كملوا ارجوكم بأسرع شكل ممكن

  24. Article طلعت اوت منكوا جداً , وتقريباً مش معمولة على فهم للواقع ودراسته .. الدنيا اتغيرت من 3 سنين عن دلوقتى جداً

    • ازيك يا مصطفى 🙂

      اللى أنت شغال فيه Student activityمع احترامى لوجهة نظرك جداً بس كون أنت شايف أن الكلام ده انتهى من 3 سنين ده يدل على أن الـ
      ناجح جدا 🙂
      لكن للأسف العيوب ديه لسه موججودة فى أماكن كتير جدا .. بالمناسبة أنا طالب فأنا لسه شاهد على حاجات كتير بتحص كده حواليا 🙂

  25. هو المقال حلو بس حاسس انه عايم اوى … يعنى انا كنت داخل اشوف نصايح على السوشييال ميديا ملقتش اللى بدور عليه لقيت كلام عام مش ده اللى كنت متوقعه … بس still المقال حلو و هتابع الباقى

    • ازيك يا أحمد 🙂

      اللى هو الدور الأول Social media أشكرك على وجهة نظرك .. هو بالفعل كلام عام زى ماأنا قلت فى الأول لأن أصلا مش هينفع تظبط الـ
      !وأنت أصلا عندك القاعدة مش متظبطة .. عشان كده بدأنا بده

      أتمنى لو ليك أى نقد تانى فى اللى جاى كمان تقول 🙂

  26. موضوع مهم جدا و يا ريت تكمل
    اهم نقطه انا محتاجها ازاي تظبط معاد للاجتماع بذات لما يكون كل واحد بيشتغل في حته مختلفه و ف العمل التطوعي محتاجين مقابلات باستمرار

  27. رائع جدااا و فعلا دى أخطاء كتير بيقع فيها … بحكم انى أشتركت فى أنشطه كتير و بتابع أخبارهم فعلا ساعات بيقعوا فى غلطات ممكن تكون بسيطه بس تودى فى داهيه …

    زى مثلا *** اللى أتقال فى رقم أربعه “التقليد” شئ سيئ و الأسوء التركيز على هزيمة الأخرين عشان ناكل منهم الجو و نلاقى أن دا بيبعدهم عن أهدافهم الاساسيه اللى هما بيشتغلوا عشانها من أهمها ال
    Vision & Mission
    و كمان ممكن تسبب أنهم يقعوا أو يغلطوا غلطه تأدى ل
    Negative Reputation and losing loyalty

    كمان عشان الانشطه اللى بنعملها دى غير هادفه للربح فبندور دايما على ***
    sponsors
    عشان يساعدونا على تحقيق أهدافنا , الغلطه اللى كتير بيقع فيها ان كلم فلان و فلان و فلان لاقيته هيساعدك تمام كمل و تابعه كويس لكن لو حد مش هيقدر يساعدك أو مش بيشتغل فى مجالك فخلاص فكك منه , دا بيبقى كارثه لأن حتى لو حد مش هيفيدنا أو مش هيقدر يساعدنا لما ن
    follow up
    دايما معاه او نتعامل معاه كويس ممكن بعد كده يغير رأيه و يساعدنا أو تلاقيه بيقدملك مساعده عن طريق حد تانى هو عارف أنه مناسب أكتر ليك.

    ***
    و كمان ننسى اننا كلنا طلبه و بنتعلم من بعض و نلاقى نفسنا بندى أوامر و بنعدل على بعض بشكل سلبى أو اننا نعلم الناس انا هقولكم تعمل كذا و كذا و متفكرش و متعملش حاجه غير اللى أقولهالك لحسن تبوظ الدنيا… هنا بننسى
    بردو ان المفروض يتقال أعمل 1 و 2 و 3 و عيش و اتعلم عادى لما تغلط هتتعلم و تعمل احسن

    بس 😀
    أنا مبسوطه جدا بال
    article
    و شكرا ليكم بجد على كل حاجه ^_^

  28. ana shyyf en el klaam daa msh s7ee7 w msh de el tre2a el tmshy beha el omoo

    lzem ykon fee ebdaa3 w e5tlaaf .. w lzem t5ood be 5breet el ablaak .. ahh mommkn tehhd w tbny mn gded bas aked fee 7agaat homaa 3’lto feha w msh mstahlaa t3’at feha tnyy msh 3eb enk tet3lm mn el ablak

    w brdo fe no2at s7 bas mograd 3 no2at

  29. el article to7fa bgd we kol dah sa7 tammn we 7asl m3aya

  30. Article من اعظم عظمات اﻻرتيكﻻﻻﻻت 😀
    والبيج من اعظم عظمااات البيجاااات :-D:-D:-D

  31. المقال حلو جدا بس ناقصه توضيح الحلول شوية اعتقد الناس هتستفيد اكتر 😀
    المطبات ال واجهتنى ان مش عارفة اوظف الجانب اﻻبداعى فى كل طالب،، اﻻبداع مش ال قال فكرة
    activity بس فيه ال بيبدع فى طريقة عرضها فى ال هيبدع باستخدام النشاط كوسيلة للدعاية مثﻻ…فا كان ﻻزم ادرس فى اﻻول طريقة تقكير كل عضو وعلى اساسه اقسم الشغل عشان اوصل لاعلى استفادة.
    المطب التانى طرح فكرة انا شخصيا مش مقتنعة بيها اوى على اساس انها ممكن تعجب ناس تانية وبالتالى مش هعرف اعرضها على الفريق وﻻ اقنعهم….وعامة اى حد بيعمل حاجة ممكن يكسب تحقيق هدفه وممكن يكسب مطبات :))

    • شكراً يا ندى على رأيك 🙂

      أتمنى أن المقال الجاى يوضح الحلول أكتر من كده شوية للـ 7 مطبات , بالنسبة للمطبين اللى قولتيهم أنا متفق معاكى فى الاتنين خصوصا التانى و ديه فيها مدستين فى الحل أنا شفتهم .. إما أن اللى مش مقتنع بيه مبتعملهوش وده أكيد هيضايق الناس الموجودة جوا الفريق والمدرسة التانية إنك لو مش مقتنع بحاجة وعليها اجماع كبير فانت بتعملها وبتبذل جهدك انها تنجح ولو فشلت فأنت معتمد أن الفيق كله هيتحمل الفشل مش انت لوحدك 🙂

  32. السلام عليكم
    أحييك على الاختلاف وعلى ال premium content بتاعك
    انا بتاعك من فترة بس معمل كومنت خالص
    والتوبيكات بتاعك استفزاز جدا لدرجة انى كنت همومنا بعد أول نقطة ف السبعة بس قلت استن وتخلص التوبيكات والتعارف معاك مرة واحدة
    كلامك صح جدا وعن تجربة أيام الكلية بس الحمد لله نجحت
    تتحفنا بتوجيهات على نفس النسق
    شكرا

  33. وأنا بقرأ بييجى فى بالى الى بيحصل بالحرف معايا فى الجامعة و لذلك أنا حسيت الموضوع من الأول لما بدأت أخرج بره و أعرف يعنى إيه نشاط أو منظمة غير هادفة للربح 😀

    أحييك يا إسلام

  34. جميل جدا والاسلوب خلاني استمر بالقراءة للاخر
    وعاوزة اعرف شكل الصفحة غريب كده ليه :)) ده فضول مش اكتر

  35. السلام عليكم اولا جزيتم الفردوس الكلام اكثر من رائع 🙂 🙂
    ثانيا لكل ده المفروض معملوش طيب ايه مطلوب مني اعمله عشان ابقي فريق ناجح ايه القواعد الثابته عشان اقدر انجح ؟

  36. I like it.it’s very simple and helpful

  37. عندي تعليقي.. الأول باعتباري
    Copywriter
    فأحب أقول إن الكتابة سيئة والإسلوب سيء .. مش لإنه لغته سلبية فقط – والمفترض إن أي مبادرات أو مشاريع تطوعية تبقى لغتها إيجابية لكن كمان طريقة الكتابة غير مفيدة علي الإطلاق .. إنت كإنك بتقول لواحد متعملش خطة وبتتريق عليه من غير ما تعرفه إيه اهمية اللي هيعمله ده أو إيه فايدته.

    التعليق التاني وهو:
    Student activities are not NGOs, there is a huge difference
    وللأسف فيه طلبة كتير فاكرين الاتنين واحد وده بيخليهم بمجرد ما يقعدوا سنه ولا سنتين في نشاط يفكروا إنهم ألموا بكل ما هو ليه علاقة باللي بيعملوه فيه في حين إن المنظمات الغير حكومية مجال واسع جدًا، وبتبقى كيانات ليها تواجد قانوني ورسمي ومجلس إدارة ….إلخ.

    It’s easy to write a blog post, but it is not easy to add a real value to the reader. Pay more time and effort for better blog posts.

    • أولاً عايز أشكرك جداً يا ياسمين على اهتمامك ، باعتبارى واحد من اللى اتعلموا منك .. أما بالنسبة لردى :

      أنا متفق مع حضرتك فيه ، عشان كده Valueفكرة أن الـمقال مفيهوش أى نوع من الـ *
      واللى بالصدفة البحتة، action steps عملنا الجزء التانى اللى بنوضح للناس فيه قيمة اللى يعملوه بـ
      فيه mention معمول لحضرتك … https://school-of-marketing.com/blog/2student-activity-%D9%807%D9%80%D9%85%D8%B7%D8%A8%D8%A7%D8%AA-%D9%87%D9%8A%D9%82%D8%A7%D8%A8%D9%84%D9%88%D9%83-%D9%84%D9%88-%D8%B4%D8%BA%D8%A7%D9%84-%D9%81%D9%89/
      *بالنسبة لتدنى مستوى الكتابة نفسه فأنا بحترم و جهة نظر حضرتك ، بس النتايج عندنا بتقول عكس كلام حضرتك لأن المقال
      ترتيبه الـ 8 على البلوج من حيث عدد مرات القراءة .. فأخيرا “اختلاف الرأى لا يفسد للود قضية”
      أكيد كلام حضرتك مظبوط ، بس الربط ما بينهم كان لنقطتين NGOs & Student activities بالنسبة لنقطة الـ *
      وثانيأأن الإتنين فى الأخر أعمال تطوعية ، NGOs أولهم .. أننا شايفين أن الأنشطة الطلابية هى أكتر حاجة ممكن تجهزك أنك تشتغل بعد كده فى عمل
      لكن أنا هنا مكنتش بتكلم عن تصنيفات أو الموقف القانونى لكل واحده منهم !

      أخيراً شكراً على النصيحة ، وأتمنى الفترة الجاية أقدر أعمل بيها 🙂 *

Leave a Message