قواعد الـMarketing الأربعون

الـ Article ده مستوحى من كتاب “قواعد العشق الأربعون، لـ إليف شافاق

دول اربعين قاعدة في الـ Modern Marketing اي Marketer محتاج يفهمهم كويس (من وجهة نظري) ، خلي بالك انا بتكلم عن الـ Marketing اللي انا مقتنع بيه، اللي هو (Marketing 3.0) 

“لو مش عارف ايه هو Marketing 3.0 أدخل على الـArticle  دي الأول ، ما هو أكيد مش هتستفاد حاجه لو قريت 40 قاعده لـMarketing 3.0 وأنت مش عارف ايه هو Marketing 3.0 أصلا 😀  ”   

Brain Poke-0١-0١ (1)

1- اول حاجة في الـ Marketing هي الـ Mission، لو مش هتغير حاجة في الدنيا ملهاش لازمة.

الـ Mission يعني انت موجود ليه سواء كشخص او كشركه او كـ اي حاجة. و الفكرة هنا ان اول خطوة في الـ Marketing هي انك يكون عندك Transformation Mission، يعني يبقى الـ Brand بتاعك موجود عشان يغير العالم، و المقصود بالعالم هنا، العالم بتاعك انت (يعني احنا في School of Marketing بنغيرالعالم، و العالم بتاعنا هو الـ Marketing Industry )

2- الـ CEO لازم يكون اتقل Marketer في الشركة.

زمان كان الـ Marketing Department من اهم الـ Departments اللي في الشركة (بيصرف اكتر فلوس)،
دلوقتي بقى لازم الـ CEO يكون اكتر حد في الشركة بيفهم Marketing. اما عن المستقبل، الـ Marketing هيبقى عامل زي الـ Communication Skills شئ بديهي لأي حد في الشركة (حتى الـ Office Boy اللي هو اهم واحد اصلاً).

3- الـ Marketing بيبتدي من قبل ما الشركه تبتدي.

القاعدة الاولى هي انك يكون عندك اصلاً Mission، اما تاني خطوة هي انك تـ Market الـ Mission بتاعتك دي للـ Customers بتوعك حتي لو لسه مفتحتش. انك تعمل Marketing لفكرة، ده ميتطلبش منك غير انك تكون مؤمن بيها الى النخاع.                                                                                                       لو النقطه دي مش واصله لك 100% أتفرج على الدقيقه وربع دول  “

4- الـ Marketing ما بيحلّيش حاجة وحشة.

الـ Marketing مش عصاية سحريه اول ما توجهها لأي حاجة، هتحلو في عين الناس و هيشتروها. اول Marketing تفكر فيه هو ان الـ Product بتاعك يكون يستحق ان الناس تشتريه، و ساعتها هتكون عديت نص الطريق.

5- لو مبقتش صاحبي بجد (دا لو انت عايز)، تبقى Marketer فاشل (في اي مكان و اي موقف و اي ظرف من الظروف).

المقصود بالقاعدة دي: انك كـ Brand لو مقدرتش تحسسني انك صاحبي، يبقى الـ Marketer اللي ماسك الموضوع فاشل من منظور الـ Modern Marketing، و ممكن يكون ناجح نجاح فظيع من منظور الـ Old Marketing (وجهة نظر).                                                                                                  ملحوظه صاحبي هنا مالهاش أي علاقه بأنك تألش وتقولي Comics  لكن ليها علاقه انك توصلي انك فاهمني جدا ومهم جداا بالنسبه لك انك تأثر في حياتي “

6- الـ Marketing الصح يقوم Business، حتي لو مجبش فلوس “دلوقتي”.

الـ Marketing الصح هو اللي يبني لك Community فعلاً بيحبك و مقتنع بيك، لو مجبتش فلوس دلوقتي مش مهم، المهم انك هتكون ساعتها عديت اصعب مرحلة في الـ Marketing بتاعك اللي هيقوملك Business.

Update .. احنا كنا قولنا الكلام ده في 2014 ولبسنا بسببه، وده اللي خلانا في 2016 نعتمد على Concept  الـClosed-Loop Marketing ، {اللي يخليك تبني Community يحبك وتجيب فلوس في نفس الوقت} هتلاقي فيديو بيشرحه قريب “

7- الـ 4Ps في الـ Marketing زي كلمة “نهارك سعيد” في اللغة المصرية.

“خبئ قصائدك القديمة كلها” انسى، لو الـ 4Ps لسه واخدين وضعهم في دماغك، ارجوك طلعهم.
الموضوع بالظبط عامل زي لما تقول لحد انا هعلمك السواقة، و اول حاجة هعلمهالك هي ازاي تفتح الباب. بجد! انا اكيد كل مرة هسوق، هفتح الباب، بس اكيد برضه اخر حاجة ممكن افكر فيها انا هفتح الباب ازاي و انا بركب.

8- الـ Branding يعني اد ايه اثرت في ثقافة الناس و طريقه تفيكرهم، مش اد ايه شافوا اسمك.

ارجوك برضه انسى انك محتاج الناس تشوف اسمك و الـ Logo بتاعك وتـPosition  في دماغهم بشكل معين   ، الفكرة مش في كده خالص، اللي المفروض تفكر فيه ” انا ازاي هفرق في حياة الـ Target Audience بتاعي، هضيف ايه لحباتهم ؟  ”

9- السعر مهم، بس ملهوش لازمة لو خلتني نفسي اني اشتري منك “نفسي”.

لو بتشتري اي Apple Product، اخر حاجة هتسأل عنها هي السعر، لأنك لو رايح تشتري من Apple هتبقي ملهوف تستخدم الحاجة اللي هم هيبيعوهالك. و ده مبيحصلش الا للـ Purple Cows، يعني الحاجات المدهشة .
“لو مش فاهم فكرة الـPurple Cow  يبقى في بتاع 4 أو 5 قواعد في الـArticle دي مش هتفهمهم فمن أولها كده متطنش الـLink  اللي فوق  “

10- انسى الـ Competitors بتوعك من فترة للتانية (في حالة انك عندكPurple Cow، لو معندكش اقفل).

احلي حاجة في الزمن ده (لو انت شغال بالـ Modern Marketing ) ان الـ Competitors بقوا شيء لذيذ، عشان انت مبقاش فيه حاجة تخاف منها زي الاول. أصل زمان كنت انت و الـ Competitors بتوعك زي بعض، و اللي يعمل اعلانات اكتر هو اللي يكسب. (اه و متنساش تغلي الـ Product عن سعره الحقيقي بدون سبب، عشان بعد فترة تعمل عرض خاص)
اما دلوقتي فـ أنت لو بتقرأ الـ Article دي، فـ انت اكيد فارق عن الـ Competitors او هتفرق لأنك فهمت. فـ بالتالي مفيش لازمة للخوف.

11- لو متكلمتش عن الـ Competitors بتوعك حلو، تبقي فاشل (وجهة نظر).

الحالة الوحيدة اللي ممكن تتكلم فيها عن الـ Competitor بتاعك بطريقة كويسة، هي انك تكون مختلف عنه “حتى لو بتقدموا نفس الحاجه” و هو ده المطلوب اثباته.

12- الـ Marketing مش فن الكلام، الـ Marketing فن الافعال اللي تستحق نتكلم عليها.

لو باصص للـ Marketing علي انه الكلام اللي المفروض تقوله عشان تقنع اللي قدامك، تبقي غلطان، الـ Marketing هو انك تعمل الحاجة اللي فعلاً تؤثر و تغير، واللي تخلي الناس تتكلم عليها من كتر ما هي تستحق.

13- لو معرفتش تؤثر في ثقافة الـ Audience و في حياتهم، هتبقي “عادي” (تعتبر في الـ Marketing شتيمة).

كل الناس بتعمل اعلانات، كل الناس بتعمل عروض، كل الناس بتعمل Average Products to Average People.
متبقاش زي كل الناس، دايماً حط في دماغك انك عايش (انت و الـ Brand بتاعك) عشان تخلي الناس بيفكروا و يعيشوا بطريقه احسن.

14- متنساش ان كل واحد فينا بيدور علي مصلحته (لو هتفيدني، همشي وراك).

انا همشي وراك لو هستفيد، يعني لو هتضيفلي حاجه وتأثر في حياتي .                                                                                                                  اكتر حاجة البشر بتدور عليها هي ان حياتهم تتغير للأحسن،و هي دي احسن Value تقدر تقدمها للـ Audience بتاعك (انك تأثر في ثقافتهم  ).

15- الـ Marketing منفعة متبادلة، اوعى تفكر تستفيد من غير ما تفيد (العكس اصح).

الـ Marketing علم اقناع، و احسن طريقه تقنع بيها اللي قدامك انه يفيدك، هي انك تفيده الاول ، ومتنساش العكس أصح 

16- اي رسالة بتخرج منك او من شركتك او موظفينك، Marketing.

خد بالك جدا من الـ Msgs اللي بتخرج من شركتك (او منك)، لأن كل حرف ليه تأثير علي اللي قدامك.                                                                                الخبر الحلو هنا: ان الافعال اقوى 100 مرة من الكلام (يعني الـ 100غلطة في الكلام، تتصلح بفعل).

17- كل ما هتسمع، كل ما هتفهم، كلما هتكسب.

احنا عندنا و دنين و بوق واحد، مسألتش نفسك ليه؟؟؟ كل ما تسمع اكتر، هتفهم اللي قدامك اكتر، هتكلمه بطريقته، فـ بالتالي هتقدر تاخد منه اللي انت عايزه. و الفكرة في السمع هنا مش ان الكلام يدخل ودانك، لأ، انه يدخل مخك و تستفيد منه

shutterstock_11996311618- الـ Marketing نظريات، طريقة تطبيقها الوحيدة هي الـ Creativity.

اكتر كلمة بتعصبني: هي ان حد يقولي كل اللي انت بتتكلم فيه ده شويه نظريات، لكن الواقع مختلف. من غير نظرية، كان زماننا لسه عايشين في كهوف. بس الفكرة بكل بساطة ان النظرية من غير Creativity فعلاً ملهاش لازمة. وعلي اد ما انت Creative في تنفيذ النظرية، هتقدر تثبت للناس انها صح.

19 – اهم حاجة على الاطلاق في الـ Marketing هي الـ Content.

حلوة علي الاطلاق دي ، بس ان جيت للحق، هي فعلاً على الاطلاق لأ
نها الوسيله الوحيده اللي هتقدر تأثر بيها على البني أدمين وكل الكلام اللي قولناه فوق ده ، و الاثبات انك لو بتقرأ الـ Content ده فـ انت في الاغلب بتحبنا و بتتكلم علينا كويس ولو متابعنا من زمان فأحتمال مش قليل نكون  قدرنا نأثر في حياتك /  حتى أغلب الـCustomers  بتوعنا جايين لنا بسبب الـContent  (انا مقصدش اتباهى و الله، انا اقصد اوريك حالة عملية انت جواها اصلاً عشان تعرف قيمة الـ Content).

لو لسه كلمة Content Marketing  مش مرسومه في دماغك بصوره واضحه تفهمك الـContent  ليه ؟ وهيخدّم الـBusiness  بتاعك في ايه يبقى أقرأ الـArticle  دي “

20- لو عملت Content لأي حد، مش هيقرأه ولا حد.

لازم تبقى عارف انت بتكتب لمين، و ده بأنك تكون عامل حاجة اسمها Buyer Persona Sheet مكتوب فيها كل حاجة عن شخصيةالـCustomer المثالي اللي ممكن يشتري منك. و طبعاً بيكون عندك اكتر من Persona،                                                                                                                                    و المطلوب منك و انت بتعمل Content انك تكتب لـ Persona واحدة من اللي موجودين عندك، بس ده ميمنعش انها تكون لأكتر من Persona في بعض الحالات، بس مش لكل الناس.

21- اعمل Content صح، بس اوعى تنسى انه Marketing.

الـ Content حلو مفيش كلام، بس الاهم منه انك تكون فاهم انك بتعمل Marketing، يعني بتحاول تكتسب ثقة مجموعه من البشر . يعني متعملش Content عشان المفروض تعمله، لكن اعمل الـContent اللي يأثر في حياة بني أدمين ، و هو ده اللي هيخليهم يدوك الـPermission المطلق  (لو مش فاهم أخر كلمتين متطنش عشان مهمين ، أرجع للـArticle  دي هتفهمهم ).

22- اعمل الـ Content و ارميه في البحر (Bad Advice).

اوعى تفتكر ان الـ Content شوية كلام، الموضوع اكبر من كده بكتير. في تخطيط و مراحل تنفيذ، و أخيرا الـ Analysis. يعني متعملش Content و تفتكر انه كده خلاص. دايماً لازم تكون في حالة Analysis مستمرة عشان تطور الـ Content بتاعك بناءً على الـ Buyer Personas بتاعتك.

23- الـ Marketing هو الحياة، و الـ Social Media هي خروجة جوه الحياة دي (افهم).

(بصراحة انا هتضايق اوي لو شرحت الجملة دي…. علي رأي الست: في حاجات تتحس و متتقالش).
#الش رخيص

24- الـ SEO مكنة Marketing تعمل بطاقة الوضع “بس للاسف مش قبل حوالي 9 شهور”

على اعتبار انك شركة عقارات، لو قدرت تثبت لـ Google انك احسن website المفروض يظهر لما حد يعمل Search على “شقق تمليك في شيراتون “. و علي اعتبار ان كلمة زي دي بيتعمل بيها 1000 Search بس في الشهر في مصر،
تخيل بقى انك يكون بيجيلك 300 واحد من الـ 1000 اللي بيدور دلوقتي علي الحاجة اللي انت بتشتغل فيها، و من غير ما تعمل اي اعلان. خد بالك ان الموضوع محتاج وقت طويل و مجهود و فلوس عشان توصل لنتايج قوية، بس اول ما بتوصل التكاليف بتقل و المكاسب بتزيد مرة واحدة.

25- لو معاك Mail List محترمة، اعرف ان نص شغل الـ Inbound Marketing بتاعك خلص.

قبل اي حاجة، لو معاك Mail List شاريها او سالفها، اعرف انها ملهاش لازمة. انا بتكلم على Mail List لناس هي اللي مسجلة معاك بمزاجها، يعني عارفينك و بيثقوا فيك. كونك وصلت لـ ده، فانت كده خصلت نص الـInbound Methodology  الأول، انك تستخدمها صح هو النص التاني (الكلام ده في بعض الحالات).

Update :- متاخدش كلمة Mail List  بالمعنى الحرفي لأن ممكن يكون الـE-Mail Marketing  مش Channel أساسيه بالنسبه لك أصلا  ، بس ده لا يمنع انك برضه لو واصل لمرحلة ان في بني أدمين عارفينك و بيثقوا فيك ومستنيين يسمعوك – أيا كانت الـChannel  اللي بتستخدمها- برضه هتكون خلصت نص الـInbound Marketing ”                                                                                                                                                                                احم .. برضه متطنش كلمة Inbound Methodology  لأنها المنهجيه بتاعتك في شغلك كله “

26- انسى انك بتبيع، انت Marketer.

انت فعلاً ملكش اي دعوة بالبيع (الشت مني دي ). لأ انا فعلاً اقصد انك ملكش دعوة بس بطريقة فلسفية شوية.
انت كل مهمتك في الحياة انك تحبب الـ Potentials Customers بتوعك فيك.                                                                                                     بس كدة تخيل لو عايز تحبب حد فيك، و حس انك بتتمصلح عليه…. شكراً!

27- اديني Leads، اديك Customers (ركز على الـ Qualified Leads).

الجملة دي في الـ Inbound هي لسان حال الـ Inbound Sales Team موجها للـ Marketing

Lead يعني شخص مهتم جدا بـ اللي انت بتعمله لدرجة انه ادالك بياناته. الـ Leads بقى بيكون في منهم جيه غلط، او مش مناسبين للحاجة اللي انت بتقدمها، و عشان كده محتاج تختار Qualified Leads عشان تسهل لنفسك انك تحولهم لـ Customers.

28- الـ Sales و الـ Marketing لازم يكونوا تحت نفس الادارة (عن الـSmarketing اتحدث).

اوعي تفصل الـ Marketing و الـ Sales عن بعض، كل ما هيندمجوا، كل ما هتستفيد اكتر ؛لأن الـ Marketing بقى الفروض يسلم الـ qualified Leads للـ Sales، و بعد كده يستلمهم منه بعد ما يشتروا. و اظن ان الشقلبة دي صعب جدا انها تحصل و الاتنين مش منسجمين.

29- دلّع، تدّلّع (عن الـ Delighting اتحدث).

دايماً سيب حاجة مهمة تدلع بيها الـ Customers بتوعك اللي اشتروا خلاص ؛ لأن ده هو اللي هيحولهم لـ Promoters. و ساعتها انت اللي هتتدلع.

30- الـ Marketing و الـ Advertising زي العربية و الـ Contact.

اوعى تتخدع في الـ Advertising لأنه عامل زي البلونة، يبان كبير بس هو فاضي من جوه (مفهوش Value اقصد). ، لازم تكون مديله حجمه اللي هو ميزدش عن 10/15 % من الـ Marketing بتاعك، عشان تركز في الاهم (الـ Value).

31- لو هتعمل Advertising Campaign، ابوس ايديك اعمل Test الاول.

الـ Advertising Campaigns زي البطيخ بالظبط (احتمالية انك تلبس فيه عاليه جدا)، بالتالي المنطق بيقول متروحش تشتري 100 بطيخة مره واحدة. جرب في واحدة او اتنين من كذا تاجر، و بعد كده شوف هتشتري منين، و انهي نوع.
(لو بتقول جوه نفسك: طب ما انا ممكن اول واحدة تطلع حلوة، و البس في الباقي…. يبقي مكانك مش هنا )

32- كل ما تدفع في الـ Ads اكتر، كل ما نتيجتها تقل .

اتكلمنا علي الموضوع ده في كتاب How to Transform yourself to an Inbound Marketer
بس هنا هلخص لك الموضوع:
1-الـ Ads اصلاً رخيصة.
2-الحاجة الكتيرة بطبعها رخيصة.
3-الـ Ads بالطبيعة كتير.
4-كل ما تكتر الـ Ads، كل ما فرصة تكرارها لنفس الشخص تزيد. و ده بيقلل نسبة تأثيرها.

33-هتعمل اعلانات بجنيه، هتكسب 2 جنيه. هتعمل Marketing بجنيه هاتخترع مكنة فلوس.

دي هي الحقيقة المرة. الاعلانات بتجيب نتيجة (بغض النظر انها ولا حاجة، بس بتجيب نتيجة)، و ده بيزغلل عيون الـMarketers و بيخليهم ينسوا ان الـ ROI بتاع الـMarketing على الـ Long Term اكبر بكتير من الـ ROI بتاع الاعلانات.                                                                                                        خليك تقيل و اشتغل لقدام.

elephant-279901_1280

34- الـ Personalization هو الحل.

زمن “الرسائل التسويقية التي تصل الى الملايين” ده خلاص انتهي. احكم انت طيب، تخيل ان قدامك 10 اشخاص عايز تقنعهم بحاجة معينة، و انت تعرف حاجة عن كل واحد فيهم…. انهي احسن، تكلمهم كلهم مرة واحدة، ولا كل واحد لوحده                                                                                                                          أنت مش هتقدر تطبق الكلام ده من غير ما تفهم الـPersonalization  كـConcept  ودي مهمة الـArticle  دي 

35- الـ Humanizationللجميع.

متقوليش اصل الـ Industry اللي انا شغال فيها مينفعش فيها الـ Humanization (يعني انك تتخلى عن صورة الكيان الرسمي، و تظهر البني ادمين اللي ورا الكيان). اي Business في الدنيا محتاج و مطلوب منه يعمل كده، لأن الطريقة اللي بيتواصل بيها مع الـ Potential Customer بتوعه اختلفت عن التليفزيون تماما، و معتمدة علي الـ Social Media اللي اساسها انك تصاحبهم.                                                                                                                               و ده بقى معناه ان الـ Humanization للجميع.

36- في الـ Marketing نجاحك هيتقاس “مبدئيا ” بالـ Word of Mouth.

ممكن يبقى في مقاييس كتير عشان تعرف انت نجحت ولا لأ في الـ Marketing بتاعك، بس اهم الحاجات هي: اد ايه الناس اتكلموا على الحاجة اللي انت عملتها. و الناس في الاغلب مش هيتكلموا الا على الـ Purple Cows.

37- الـ Stories هي عملة الـ Marketing الرسمية.

القصة هي اكتر حاجة بتثبت في دماغ البني ادمين، و الـ Marketing هدفه النفيس هو الـ Mind Share،
فـ بالتالي لازم تعرف كويس قوي قيمة الـ Storytelling، و تعرف تستخدمها صح.

38- اللي يشتغل في الـ Marketing لازم يكون مجنون.

بصوا بقى من غير رغي “لو انت مش مجنون، اوعى تشتغل في الـ Marketing لانكم مش هترتاحوا لبعض خالص”.

39- لما تغلط، اعترف، متبجحش.

احنا المفروض اتكلمنا عن اننا هدفنا نصاحب الـ Potential Customers و الـ Fans بتوعنا. و من القوانين اللي هتحافظ علي الصداقه دي، هي انك تعترف بغلطك و تصلحه.

40- البساطة ممكن تبقى اعقد من التعقيد نفسه (Steve Jobs).

ببساطة، خليك بسيط.

لو فاهم كل القواعد دي كويس فأنت جاهز تبدأ تطبق ، وزي ما اتفقنا في القاعده رقم 19، ان الخطوه الأولى والأهم على الاطلاق هي الـContent Marketing
لو مش فاهم يعني ايه Content Marketing ممكن تفهمه من هنا 
لو فاهم وجاهز تبدأ تطبقه ففي كتاب تنفيذي معمول عشان يمشي معاك خطوه بخوه وأنت بتـCreate Content ممكن تشتريه من هنا 

By :- Ahmed Saif 

ديسمبر 20, 2017

48 responses on "قواعد الـMarketing الأربعون"

  1. Really as a Marketer I want to Working with you. Good Job.

  2. انا فعلا سعيده جدااا اني قرأت الكلام ده
    سعيده لسببين بصراحه
    الاول ان عجبتني طريقه كتابه الموضوع فعلا لانها طريقه سهله وسريعه الفهم وقريبه لحياتنا
    وتاني حاجه يمكن والاهم بالنسبه لي اني عرفت الحمد لله ان اغلب طريقتي في التفكير في التسويق قريبه جداا للكلام الي انتم كاتبينه
    مع اني في الحقيقه عمري ما اشتغلت تسويق بس الحمد لله ببدأ حاليا في مشروعي الخاص وبقرا كتير اووووي
    اتمنى ليكم النجاح فعلا
    و اكيد كسبتمcustomer يتمنى يتابعكم ديما
    تحياتي

  3. طبعاً أنا متابعكم من فترة بس صراحة البوست دا فيه كمية معلومات ونصائح من أروع ما قرأت خلال الفترة دا

    شكراً جزيلاً ا.أحمد

  4. ممتاز بارك الله لك في البساطة

  5. شكرا جزيلا بجد أكتر من رائعه و مفيده جدا
    ممكن ناخد مثال عملى يعنى ناخد منتج مثلا أو فكره و نطبق عليه القواعد كلها ؟؟

  6. Thank you , Nice style and easy to understand

  7. انت مية المية المية المية وأسيادنا راضيين عنك 😀
    حقيقي محتوى رائع ، أوحت لي بكذا فكرة تسويقية
    الترقية الجديدة هادعيلك 😀

  8. انتوا فين من زماااان 🙂 بجد افدتونى جدااا بس بصراحة اول نقطة خالص دى اكثر حاجة انا بفكر فيها هى انا هنا ليه!! انا جيت الدنيا ليه!! انا ايه لزمتى اصلا فالمجتمع!! و على هذا الاساس بشتغل 🙂 انا بجد نفسى اخذ الكورس معاكم ياريت التفاصيل 🙂

  9. شكرا كبير لحضرتك بجد استفادنا كتير منها شكرا

  10. الله ينور يا معلم كلام جميل أوي وداخل دماغي بنسبة 100 % . ومتفق معاك في كل النقاط .

  11. عمل متميز..بسط لنا علم التسويق بطريقة حرفية و هو مدخل رائع لمزيد التعمق في هذا العلم فشكرا يا أخ أحمد

  12. في الحقيقة, انا اتكيّفت من قرايه المقال ده
    واحب اشكرك لأنك اوحتلي بافكار جميله هتساعدني كتير قدام في شغلي كmarketer 🙂

  13. Dear Ahmed,

    professional article, i think I’m on the track.

    Best regards,
    Amr

  14. Dear Ahmed,

    First let me thank you for this great and easy steps,

    what really i stoped in was number 28 which is 4Ps, and i just read and article consedering Modern 4Ps which is become now.
    1- Personlizatiod
    2- participation
    3- Peer 2 Peer
    4- Predictive Modelling

    NB: i just want to share this as one day i heard from Shereen Badr one sentence said “فيد و خلي غيرك يستفيد”

    Best regards,

    Amr,

  15. To the point, creative, funny, it was fruitful. Thanks

  16. أولا كلامك جميل و مفيد جداً و طريقة الشرح و السرد تحفة .. تانى حاجة انا فعلا بطبق كلامك دة ف شغلى و فيه حاجات كتيرة جداً بستفاد منها من المواضيع اللى بتعملوها ..الجميل فى الكلام دة انه بيطبق فعلا ف الحياه مش فالشغل بس لاء مع اصحابننا و معارفنا و كل الناس

  17. انا سعيده جداااااا انى بقرا القواعد دى و حاسه بكم رهيب من الطاقه الايجابيه اللى هاتخلينى ابدأ مشروعى بطريقة صح
    و بجد شكراااا جدا على المعلومات دى و البساطه فى توصيلها و الاهم من ده الاخلاص و الصدق اللى مكتوبين بيه ….. تمنياتى ليكم بالتوفيق و ادعولى ان ربنا يوفقنى

  18. روعه بصراحه انتوا ناس ميه الميه الميه
    🙂

  19. حسيت باستمتاع وانا بقرا المقاله وده لانى بحب الماركتنج وعلشان كده عارفه انكم كنز 🙂

اترك رداً على Ahmed Saif إلغاء الرد